self confidence

 ઘણીવાર જિંદગીમાં એવો સમય આવે છે કે મજબૂત મનોબળની વ્યક્તિ પણ પોતાનો આત્મવિશ્વાસ ખોઈ બેસે છે, પણ દરેક પ્રતિકૂળ પરિસ્થિતિનો સામનો કરવાની તાકાત પણ માણસમાં ક્યાંકને ક્યાંક પડેલી હોય છે. વ્યક્તિને જો પોતાનામાં વિશ્વાસ હોય તો તે ખોવાયેલો આત્મવિશ્વાસ ફરી પ્રાપ્ત કરી શકે છે. બસ થોડીક વાતો પર ધ્યાન આપવાની જરૂર છે.

તમારી લાયકાત પર ભરોસો રાખો.

દરેક વ્યક્તિમાં વિશિષ્ટ લાયકાત રહેલી હોય છે. બની શકે કે તમે સારી રસોઈ કરી બનાવી શકતાં હોવ કે કવિતા લખી શકતાં હોવ અથવા તો તમને ઇતિહાસ પ્રત્યે લગાવ હોય અને જાણકારી હોય. તમારી પસંદગીના કામોનું લિસ્ટ બનાવો અને તેમાંથી ગમે તે એકને પસંદ કરી તેના પર પૂરી લગનથી કામ કરો. આનાથી તમારો આત્મવિશ્વાસ જરૂરથી વધશે.

થોડો સમય સારા લોકો સાથે વિતાવો.

તમારા પરિવાર અને મિત્રો સાથે થોડો સમય પસાર કરો. જે ખરેખર તમને પ્રેમ કરે છે. આવા લોકો હંમેશાં તમને આગળ વધવા પ્રોત્સાહન આપશે. સારા લોકોનો સાથ તમને પોઝિટિવ એનર્જીથી ભરી દેશે. 
રચનાત્મક કાર્ય કરો.
કોઈ નવા પ્રોજેક્ટ અથવા કોઈ રચનાત્મક કામમાં મન લગાવો. પેઇન્ટિંગ કે નવો ડ્રેસ ડીઝાઇન કરો. જેમ જેમ તમે રચનાત્મક કામ પૂરું કરતાં જશો તેમ તેમ તમારો આત્મવિશ્વાસ વધતો જશે.

સાહસ કરો તો ખરા!

ઘણીવાર લોકો નવું કંઈક કરવાનું વિચારે તો છે, પણ તેવું કરતાં ખચકાય છે. એનો મતલબ એવો નથી કે કોઈપણ આંધળું સાહસ ખેડો, પણ હંમેશાં ‘ડર કે આગે જીત હે’ એ જીવન મંત્ર યાદ રાખો.
હંમેશાં એક્ટિવ રહો અને સદાય હસતા રહો.
નવી એક્સરસાઇઝ કરવાનું શરૂ કરો. તમારું સ્વાસ્થ્ય સારું હશે તો પણ તમારો આત્મવિશ્વાસ વધશે. તમારો સમય ગમે તેટલો ખરાબ હોય પણ તમારા ચહેરા પરનું હાસ્ય ક્યારેય મૂરઝાવા ના દેશો.