સંબંધો ડિસ્પોઝેબલ નથી હોતા કે તમે યુઝ એન્ડ થ્રોનો રૂલ્સ અપનાવો

 સંબંધો ડિસ્પોઝેબલ નથી હોતા કે તમે યુઝ એન્ડ થ્રોનો રૂલ્સ અપનાવો

          સામાન્ય રીતે ડિસ્પોઝેબલનો અર્થ એવો થાય કે તેનું કામ પૂરું થાય એટલે તે ફેંકી દેવું તેવો થાય.
એટલે જ તેવા ગ્લાસને આપણે ડિસ્પોઝેબલ ગ્લાસ કે પ્લેટ કહીએ છીએ. યુઝ એન્ડ થ્રો, પણ જ્યારે રીલેશનમાં આવું થવા લાગે ત્યારે તે ખતરનાક કહેવાય.
           આ યુઝ એન્ડ થ્રોની માનસિકતા આપણામાં હોય જ છે, પણ તે યોગ્ય નથી. આને આપણે સ્વાર્થી મતલબી કહીએ છીએ. જ્યારે લોહીના સંબંધોના ‘હાલ’ હાલમાં ‘બેહાલ’ છે, ત્યારે મોંબોલ્યા સંબંધોની તો વાત જ શી કરવી. પહેલાં વખત એવો હતો કે બાપદાદાઓના સંબંધો આગળની પેઢીઓ નિભાવતી હતી.
          નવા જમાનામાં સંબંધો પોતપોતાની જરૂરિયાત મુજબ બાંધવામાં આવે છે અને નિભાવવામાં આવે છે. ભાઈ કરતાં મિત્રના સંબંધો વધી ગયા છે. એનું કારણ કદાચ આપણું સામાજિક માળખું બદલાઈ રહ્યું છે તે હોઈ શકે.
          દરેક વ્યક્તિ એવું વિચારે છે કે સામેવાળી વ્યક્તિને હું બોલાવીશ તો તે મને શું ફાયદો કરાવશે. અથવા મારે શું કામમાં આવશે? સંબંધો ગિવ એન્ડ ટેકના રીલેશન થઈ ગયા છે. પરિવારમાં પણ બજારવાદે પ્રવેશ કર્યો છે. કયો સંબંધ કેટલો ઉપયોગી તેના પર તેનું મહત્ત્વ.
         અને આને કારણે સંબંધોની વીરડી સૂકાઈને રણપ્રદેશ બની ગઈ છે. જ્યાં ભાવનાઓના જળ માત્ર મૃગજળ જ હોય છે. આનાં ઉદાહરણો કોઈ ઘરના વડીલ રીટાયર્ડ થાય એટલે તેની સારસંભાળમાં માનપાનમાં ફેર આવી જાય. ઘરમાં બે દીકરા હોય તો જે વધુ કમાતો હોય તેની કિંમત વધુ.
 બધંુ જ રૂપિયાથી નક્કી કરવામાં આવે છે. પણ મિત્રો કે રૂપિયા જ સર્વસ્વ નથી.