ઠંડા ઠંડા કૂલ કૂલ જ્યૂસ અને શરબત તબિયત રાખશે ટનાટન

ઠંડા ઠંડા કૂલ કૂલ જ્યૂસ અને શરબત તબિયત રાખશે ટનાટન
ઉનાળામાં તમને વારંવાર તરસ મહેસૂસ થયા કરે છે અને આનો સરળ ઉપાય છે કે તમે કંઈક ને કંઈક ઠંડંુ પીધા કરો.
ઠંડા ઠંડા કૂલ કૂલ
‘લેમન જ્યૂસ ઈઝ અવર ફેવરેટ’ આ વાક્ય છે નાનાં ભૂલકાંઓનું. ગરમીમાં જેટલું પી શકો તેટલું લીંબુ શરબત પીવું જોઈએ. લીંબુ શરબતમાં થોડું મીઠું અને ખાંડ અવશ્યથી ઉમેરવાં. મીઠાથી શરીરમાંથી પરસેવા રૂપે જે સોલ્ટ બહાર આવે છે તેની ભરપાઈ થઈ જાય છે. ખાંડ તો ઉનાળામાં ખૂબ સારી.
છાશ
છાશમાં પ્રોટીન ભરપૂર હોય છે. છાશ શરીરના ટીશ્યુને જે નુકસાન થાય તેને સરભર કરે છે. લસ્સી નહીં પણ છાશ પીઓ. આયુર્વેદમાં પણ છાશને ઉત્તમ પીણું માનવામાં આવે છે. છાશથી જમવાનું સરસ રીતે પચી જાય છે. છાશમાં જીરું  કાળામરી વગેરેનો પાવડર બનાવીને નાંખવો. બજારમાં મળતી છાશના પેકેટ પર એક્સપાયરી ડેટ અવશ્ય ચેક કરો. પેકિંગ પણ બરાબર હોય તે ચેક કરીને લો.
ઠંડાઈ
ઠંડાઈમાં બદામ, ગુલાબ, મગજતરીનાં બી, ખસખસ વગેરે હોય છે. જેને દૂધ સાથે પીવામાં આવે છે. જો તમારું સુગર લેવલ ઠીક હોય તો આ ગરમીનું ખૂબ જ સરસ પીણું છે, પણ ખાંડ અને ડ્રાયફ્રૂટનું પ્રમાણ વધારે હોવાથી વજન વધવાની શક્યતા છે. બીપી અને ડાયાબિટીસના પેશન્ટે ઠંડાઈની પરેજી કરવી. બાળકો માટે તે ખૂબ જ સારી છે.
વેજિટેબલ સૂપ
જ્યૂસ પીવું એના કરતાં શાક ખાવું વધુ સારું, પણ એમ છતાં સૂપના શોખીનો કાકડી, દૂધી, આંબળાં, ટામેટાં, વગેરેનો મિક્સ સૂપ પી શકે. આયુર્વેદ કહે છે કે બે કડવી વસ્તુઓનો મિક્સ સૂપ ક્યારેય ના પીઓ. કેમ કે આનાથી એસીડીટી થવાની સંભાવના રહે છે. જોકે સુગરના દર્દી માટે કારેલાનો જ્યૂસ કે સૂપ ઉત્તમ છે.
ફ્રૂટ જ્યૂસ
જ્યૂસમાં ફક્ત ફ્રૈક્ટોજ જ હોય છે. જ્યારે ફળમાં ફાઇબર હોય છે. એટલે જ્યૂસ કરતાં ફળ ખાવું વધુ સારું. જ્યારે પણ તમને જ્યૂસ પીવાની ઇચ્છા થાય તો ફ્રેશ જ્યૂસ જ પીઓ. અગાઉથી તૈયાર કરેલા જ્યૂસ સ્વાસ્થ્ય માટે હાનિકારક છે. જ્યૂસને ગરમ કરવાથી તેની ન્યુટ્રિશન વેલ્યુ ઘટી જાય છે. ઉનાળામાં ઋતુગત ફળોનો જ્યૂસ પીઓ. તરબૂચનો જ્યૂસ શ્રેષ્ઠ કહી શકાય. પણ ઘરનો જ જ્યૂસ સારો.
પેક્ડ જ્યૂસ
જ્યારે કોઈ પણ ઉપાય ના બચ્યો હોય ત્યારે જ પેક્ડ જ્યૂસ પીવો. કેમ કે આમાં સુગર ખૂબ વધારે પ્રમાણમાં હોય છે. વળી પ્રીઝર્વેટિવ પણ ખૂબ હોવાથી શરીર માટે યોગ્ય નથી. જો તેમ છતાંય તમારે પેક્ડ જ્યૂસ પીવો હોય તો સારી કંપનીનો અને તેની પેકિંગ ડેટ અને એક્સપાયરી ડેટ વાંચીને જ પીઓ.