શરીરે સોજા આવવાનાં કારણો

શરીરે સોજા આવવાનાં કારણો

આપણે વાતાવરણના એવા મહાસાગરમાં જીવીએ છીએ કે જ્યાં બેક્ટેરિયા, ફંગસ, વાઇરસ, વિષાણુ, પેરેસાઇટ્સ વગેરે આપણી આસપાસ જીવે છે. આપણું શરીર નવ બારણાંનું પાંજરું છે. જેનાથી આપણાં શરીરમાં ગમે તે દ્વારથી પ્રવેશ કરે છે. એ સિવાય પણ રોજિંદા કાર્યશૈલીમાં પણ છોલાવાથી, ઘસાવાથી, વાગવાથી કે કપાવાથી પણ શરીરમાં પ્રવેશવાનો માર્ગ મળે છે. ત્વચામાં નમીની કમીના કારણે એડીઓમાં હોઠ પર અને ગાલ પર ચીરા પડી જાય છે.

 જો આપણી ઈમ્યુન સીસ્ટમ મજબૂત ના હોય તો આ કારણોને કારણે તેનાથી પ્રભાવિત ભાગ પર સોજા આવી જાય છે. મચ્છર કરડવાથી, કોઈ ઝેરીલા જીવડાંના ડંખથી, કોઈ તીવ્ર પ્રવાહીના સંપર્કથી પણ સોજો આવી શકે છે. સાથે સાથે તે ભાગ લાલ થઈને ફૂલી જાય છે. શરીરના અન્ય ભાગ કરતાં વધારે ગરમ હોય છે અને દુખાવો પણ થવા માંડે છે.
 આ ભાગમાં લોહીનું પરિભ્રમણ વધી જાય છે અને તેથી ત્યાં લાલાશ અને ગરમી વધી જાય છે. આ ભાગની બારીક રક્તનલિકાઓમાં પ્રોટીનયુક્ત પદાર્થનો સ્ત્રાવ વધવાથી સોજો આવે છે. જેના કારણે એ અંગની કાર્યક્ષમતા ઓછી થઈ જાય છે અને તેને લીધે ત્યાં દુખાવો થાય છે.
 સાથે સાથે તે જગ્યાએ આપણા રક્ષા સૈનિક સમા શ્વેતકણો બહારના આક્રમણ સામે મુકાબલો કરવા એકઠા થવા માંડે છે. આ બહારના સંક્રમણના કારકને નષ્ટ કરવાનો પ્રયત્ન કરે છે. જેવી તેમને આમાં સફળતા મળે તેવો જ સોજો ઓછો થવા લાગે છે.
 જો સંક્રમણ શ્વેત કણો કરતાં વધારે શક્તિશાળી હોય તો આવા સમય પરુ થઈ જવાની શક્યતાઓ રહે છે જેને એન્ટિબાયોટિક દવાઓ અને મલમ કે ગરમ ઠંડા પાણીના શેક કરીને મટાડવાની કોશિશ કરવામાં આવે છે.